Sa mund të durojë një njeri
Kur poshtërohet e plagoset
Goditet e brengoset
Pa pushim
A e di?
Sa mund të durojë një njeri
Kur dita i bëhet natë
E ëndrra baltë
E rresht së besuari
A e di?
Sa mund të durojë një njeri
Kur ecën e rrëzohet
Ngrihet e pengohet
Përsëri e përsëri
Sa mund të durojë një njeri
Kur njeriun pranë s’e ka
Të pyeta ty
A e di?
Sa mund të durojë një njeri
Më the i habitur: Po bën shaka?!
Aq sa unë do të duroja për ty
Një përjetësi